Ish-banorja e “Big Brother VIP Albania”, Selin, ka komentuar së fundmi intervistën që moderatorja Brikena Selmani zhvilloi me Gretën në emisionin “Top Arena”, duke shprehur hapur pakënaqësinë e saj për mënyrën se si u drejtua biseda dhe për disa nga pyetjet që iu parashtruan ish-banores së reality shoë-t.
E ftuar në emisionin “Pushime on Top”, Selin u ndal veçanërisht te një pyetje e Brikena Selmanit drejtuar Gretës, e cila kishte të bënte me faktin nëse ish-banorët e “Big Brother VIP Albania” vazhdonin ende të flisnin për të edhe pas përfundimit të spektaklit.
Sipas Selinit, një pyetje e tillë ishte e panevojshme dhe nuk i shërbente zhvillimit të intervistës.
Ajo theksoi se është e rëndësishme që secili të ketë besim dhe vetëvlerësim, por njëkohësisht duhet të ruajë një qasje realiste ndaj situatave dhe të mos krijojë përshtypjen se gjithçka sillet rreth një personi.
“Është në rregull kur e vetëvlerëson veten, por njeriu duhet të qëndrojë me këmbë në tokë”, u shpreh Selin gjatë intervistës.
Ish-banorja shtoi se, nëse e njëjta pyetje do t’i ishte drejtuar asaj, do të kishte reaguar ndryshe dhe do të kishte dhënë një përgjigje të drejtpërdrejtë. Sipas saj, mënyra se si u formulua pyetja nuk ishte e përshtatshme dhe nuk solli ndonjë vlerë të shtuar në intervistë.
“Çfarë nuk më ka ardhur mirë ishte një pyetje totalisht pa lidhje. Nëse Brikena do të më kishte pyetur mua, do t’i kisha dhënë përgjigjen”, deklaroi ajo.
Selin ngriti pikëpyetje edhe për faktin se moderatorja kishte zgjedhur ta diskutonte emrin e saj me Gretën, në vend që ta ftonte drejtpërdrejt për të marrë qëndrimin e saj mbi këtë çështje.
Sipas saj, intervistat duhet të fokusohen te të ftuarit dhe temat që lidhen drejtpërdrejt me ta, duke shmangur pyetjet që mund të krijojnë polemika të panevojshme.
Në fund të deklaratës së saj, Selin komentoi edhe punën e Brikena Selmanit si moderatore, duke theksuar se moderimi kërkon përgatitje, studim dhe zhvillim të vazhdueshëm profesional.
Ajo u shpreh se kushdo që synon të ndërtojë një karrierë në televizion duhet të marrë shembull nga figurat me përvojë në gazetari dhe moderim.
“Nëse aspiron të bëhesh moderatore, minimalja që duhet të bësh është të studiosh. Të studiosh figura që kanë vite në moderim, televizionin dhe rolin e gazetarit”, përfundoi Selin.
Deklaratat e saj kanë nxitur diskutime në rrjetet sociale, ku ndjekësit kanë ndarë mendime të ndryshme lidhur me kritikat e adresuara ndaj moderatores dhe mënyrës së zhvillimit të intervistës.
