Historia e dashurisë mes Brikena Selmanit dhe Mateo Borrës vazhdon të tërheqë vëmendjen e publikut, ndërsa dyshja nuk heziton të ndajë herë pas here momente të veçanta nga marrëdhënia e tyre.
Këtë herë, çifti u shfaq së bashku, ku Mateo ishte i ftuari special i moderatores dhe partneres së tij, Brikenës.
Intervista u karakterizua nga atmosfera e ngrohtë, batutat dhe pyetjet pikante, ku publiku pati mundësinë të mësonte më shumë rreth dinamikës së marrëdhënies së tyre.
Brikena vendosi ta vinte partnerin përballë disa pyetjeve personale, ndërsa Mateo u përgjigj pa hezitim, duke treguar sinqeritet dhe duke zbuluar detaje që deri më tani nuk ishin dëgjuar.
Një nga temat që mori më shumë vëmendje ishte xhelozia në çift. E pyetur se kush është më xheloz mes tyre, Brikena me humor ia drejtoi përgjigjen partnerit të saj, ndërsa Mateo e pranoi menjëherë se është ai personi më xheloz në marrëdhënie.
Ai kujtoi se edhe gjatë qëndrimit në shtëpinë e “Big Brother VIP 5” kishte folur hapur për këtë tipar të karakterit të tij dhe nuk u përpoq ta mohonte as këtë herë.
“Unë mbahem për person të drejtpërdrejtë, ashtu si edhe për xheloz. Këtë e kam thënë edhe në Big Brother.
Për një njeri që dua, do bëhem xheloz dhe këtë gjë nuk e ndryshoj dot kurrë në karakterin tim. Mund ta zbus, mund ta përmbaj veten, por jo ta eliminoj.
Po të mos isha xheloz, nuk të dua,” u shpreh ai, duke lënë të kuptohet se për të xhelozia është një shprehje e ndjenjave dhe jo thjesht një dobësi e karakterit.
Biseda vijoi me një tjetër pyetje interesante, ku Brikena i kërkoi partnerit ta përshkruante me pesë fjalë. Mateo u mendua për pak çaste dhe më pas renditi cilësitë që, sipas tij, e karakterizojnë moderatoren.
“E bukur, e zgjuar, pak dramatike, pak impulsive, ambicioze dhe e shkathët… u bënë gjashtë,” tha ai mes buzëqeshjes, duke bërë që në studio të shpërthente e qeshura.
Nga ana tjetër, edhe Brikena shfrytëzoi momentin për t’i shprehur publikisht dashurinë partnerit të saj. Ajo tha se e konsideron Mateon një nga meshkujt idealë dhe se ndihet me fat që e ka në jetën e saj.
“Unë mendoj se ti je një nga meshkujt më idealë për çdo vajzë dhe unë jam shumë e lumtur që të kam gjetur ty, sepse për mua je mashkulli im ideal,” u shpreh ajo me emocion.
Fjalët e saj prekën Mateon, i cili reagoi menjëherë me një shprehje të ëmbël.
“A vdeksha, ta ha zemrën,” iu përgjigj ai, duke sjellë një tjetër moment romantik që u mirëprit nga publiku.
Megjithatë, pyetja më pikante e intervistës erdhi në fund, kur Brikena e pyeti nëse kishte dashur ndonjëherë një vajzë më shumë se atë.
Mateo dha një përgjigje të prerë, duke theksuar se, edhe pse çdo dashuri është e ndryshme, asnjëherë nuk ka përjetuar ndjenja më të forta sesa ato që ka për Brikenën.
“Siç thonë, dashuritë janë të ndryshme, sa i përket familjes dhe partneres. Jo, nuk kam dashur asnjë femër sa ty dhe këtë e kam kuptuar në momentin që kam shkelur shumë gjëra të vetes sime që nuk kam menduar se do t’i shkelja kurrë për një partnere. Dhe ajo e vetmja je ti. Sikur më ke bërë magji,” deklaroi ai.
Me humorin që e karakterizon, Brikena nuk e la pa një përgjigje batutën e partnerit dhe ia ktheu menjëherë:
“Magji të zezë.”
Ky moment u prit me të qeshura në studio dhe u bë një nga fragmentet më të komentuara të intervistës në rrjetet sociale.
Me sinqeritetin, batutat dhe deklaratat e dashurisë që shkëmbyen gjatë bisedës, Brikena Selmani dhe Mateo Borri dëshmuan edhe një herë se marrëdhënia e tyre vazhdon të jetë e fortë, ndërsa publiku mbetet gjithmonë kurioz për çdo detaj nga historia e tyre e dashurisë.
